शिवलिंग बोधने यांची शिवसेनेच्या विधानसभा सहसंपर्कप्रमुखपदी नियुक्ती

परभणी,(प्रतिनिधी) : शिवसेना (उद्धव बाळासाहेब ठाकरे) पक्षाच्या परभणी विधानसभा सहसंपर्कप्रमुखपदी शिवलिंग बोधने यांची नियुक्ती करण्यात आली आहे.
मुंबई येथील शिवसेना भवनातून ही नियुक्ती जाहीर करण्यात आली. पक्षप्रमुख उद्धव ठाकरे आणि युवा सेना प्रमुख आदित्य ठाकरे यांच्या आदेशानुसार, तसेच परभणी लोकसभा संपर्कप्रमुख प्रदीप खोपडे, आमदार डॉ. राहुल पाटील, जिल्हाप्रमुख विष्णू मुरकुटे, जिल्हाप्रमुख रविंद्र धर्मे आणि महानगरप्रमुख डॉ. विवेक नावंदर यांच्या शिफारशीनुसार ही नियुक्ती करण्यात आल्याचे सांगण्यात आले. शिवलिंग बोधने यांनी विविध शेतकरी आंदोलने आणि सामाजिक उपक्रमांच्या माध्यमातून राजकीय व सामाजिक क्षेत्रात काम केले आहे. सामाजिक बांधिलकी जपत त्यांनी आतापर्यंत 110 वेळा रक्तदान केले आहे. त्यांच्या या नियुक्तीमुळे परभणी विधानसभा क्षेत्रात पक्षसंघटनेच्या कामाला बळ मिळेल, अशी अपेक्षा व्यक्त केली जात आहे. या नियुक्तीबद्दल शिवसेना (उद्धव बाळासाहेब ठाकरे) पक्षाच्या पदाधिकार्‍यांनी आणि शिवसैनिकांनी शिवलिंग बोधने यांचे अभिनंदन केले आहे.