रेल्वे मार्गावरील कामांमुळे नांदेड विभागातील अनेक गाड्या रद्द : नांदेड-जालना-तिरुपतीसह संतरागाछी एक्स्प्रेसचाही समावेश; प्रवाशांना प्रवासाचे नियोजन करण्याचे आवाहन

परभणी,(प्रतिनिधी) : रेल्वे मार्गावरील पायाभूत सुविधांच्या कामांमुळे दक्षिण मध्य रेल्वेच्या नांदेड विभागातून धावणार्‍या काही विशेष गाड्या आणि एक्स्प्रेसच्या फेर्‍या रद्द करण्यात आल्या आहेत. गुंटकल विभागातील रेनिगुंटा यार्डच्या पुनर्रचनेसह इलेक्ट्रॉनिक इंटरलॉकिंग प्रणाली कार्यान्वित करण्याचे काम तसेच चक्रधरपूर विभागातील झारसुगुडा स्थानकाच्या प्रवासी यार्डच्या पुनर्रचनेमुळे हा निर्णय घेण्यात आला आहे.
रेनिगुंटा यार्डमधील कामांमुळे गाडी क्रमांक 07603 नांदेड-तिरुचानूर विशेष गाडी 15 आणि 22 डिसेंबर 2026 रोजी, तर गाडी क्रमांक 07604 तिरुचानूर-नांदेड विशेष गाडी 16 आणि 23 डिसेंबर रोजी रद्द राहणार आहे. तसेच गाडी क्रमांक 07814 जालना-तिरुपती विशेष गाडी 12 नोव्हेंबर 2026 रोजी आणि गाडी क्रमांक 07815 तिरुपती-जालना विशेष गाडी 13 नोव्हेंबर रोजी रद्द करण्यात आली आहे. याशिवाय गाडी क्रमांक 17637 जालना-तिरुचानूर गाडी 14 आणि 21 डिसेंबर 2026 रोजी, तर गाडी क्रमांक 17638 तिरुचानूर-जालना गाडी 15 आणि 22 डिसेंबर रोजी धावणार नाही.
दरम्यान, झारसुगुडा स्थानकातील प्रवासी यार्डच्या पुनर्रचनेच्या कामामुळे गाडी क्रमांक 12767 नांदेड-संतरागाछी एक्स्प्रेसच्या 23 आणि 30 नोव्हेंबर, 7, 14, 21 आणि 28 डिसेंबर 2026 तसेच 4 आणि 11 जानेवारी 2027 या तारखांच्या एकूण आठ फेर्‍या रद्द करण्यात आल्या आहेत. त्याचप्रमाणे गाडी क्रमांक 12768 संतरागाछी-नांदेड एक्स्प्रेसच्या 25 नोव्हेंबर, 2, 9, 16, 23 आणि 30 डिसेंबर 2026 तसेच 6 आणि 13 जानेवारी 2027 या तारखांच्या एकूण आठ फेर्‍या रद्द राहणार आहेत.
प्रवाशांनी या बदलांची नोंद घेऊन प्रवासाचे नियोजन करावे, असे आवाहन दक्षिण मध्य रेल्वेच्या नांदेड विभागाच्या जनसंपर्क विभागामार्फत करण्यात आले आहे.