परभणी-हिंगोली स्थानिक प्राधिकारी मतदारसंघाच्या; निवडणुकीत सईद खान शेरगुल खान विजयी

परभणी, (प्रतिनिधी) :- महाराष्ट्र विधान परिषदेच्या परभणी-हिंगोली स्थानिक प्राधिकारी मतदारसंघाच्या निवडणुकीत सईद खान शेरगुल खान हे विजयी झाले. जिल्हाधिकारी तथा निवडणूक निर्णय अधिकारी संजयसिंह चव्हाण यांच्या हस्ते त्यांना प्रमाणपत्र प्रदान करण्यात आले.
यावेळी निवडणूक निरीक्षक रूचेश जयवंशी, निवासी उपजिल्हाधिकारी अनुराधा ढालकरी, उपजिल्हा निवडणूक अधिकारी अरूणा संगेवार, उपविभागीय अधिकारी, तहसीलदार, मतमोजणीसाठी नियुक्त अधिकारी-कर्मचारी तसेच उमेदवारांचे प्रतिनिधी उपस्थित होते.
दि. 18 जून रोजी या निवडणुकीसाठी झालेल्या मतदानात परभणी व हिंगोली जिल्ह्यातील सात मतदान केंद्रावर 466 पैकी 465 मतदारांनी मतदानाचा हक्क बजावला होता. या मतांची मतमोजणी आज कडेकोट बंदोबस्तात तसेच शांततेत व सुरळीत पार पडली.
आज झालेल्या मतमोजणीनंतर सईद खान शेरगूल खान (पक्ष-शिवसेना) यांना 242 मते मिळाली, तर विवेक पांडुरंग नावंदर (पक्ष-शिवसेना (उध्दव बाळासाहेब ठाकरे) यांना 159 आणि सुशीलकुमार सुरेशराव देशमुख (अपक्ष) यांना 56 मते मिळाली. 8 मते बाद ठरली.
***