जिंतूरमध्ये जुगार अड्ड्यावर पोलिसांची धाड : पाच व्यक्ती ताब्यात; एक लाख 80 हजार रुपयांचा मुद्देमाल जप्त

जिंतूर,(प्रतिनिधी) : जिंतूर शहरातील एका महाविद्यालयाच्या पाठीमागील परिसरात सुरू असलेल्या अवैध जुगार अड्ड्यावर पोलिसांनी धाड टाकून कारवाई केली. या कारवाईत पाच जणांना ताब्यात घेण्यात आले असून, दोघे जण फरार झाले आहेत. पोलिसांनी जुगारासाठी वापरण्यात येणारे साहित्य आणि रोख रक्कम असा एकूण 1 लाख 80 हजार रुपयांचा मुद्देमाल जप्त केला.
महाविद्यालयाच्या पाठीमागील परिसरात जुगार सुरू असल्याची माहिती जिंतूर पोलिसांना मिळाली होती. त्यानुसार पोलिसांनी नियोजनबद्ध पद्धतीने छापा टाकला. पोलिसांची चाहूल लागताच काही जणांनी पळून जाण्याचा प्रयत्न केला. या कारवाईत पाच जणांना ताब्यात घेण्यात आले, तर दोघे जण फरार झाले. याप्रकरणी संबंधित कायद्यानुसार गुन्हा दाखल करण्यात आला आहे.
पोलीस निरीक्षक नामदेव रेड्डी यांच्या मार्गदर्शनाखाली सहायक पोलीस निरीक्षक सुधाकर चव्हाण, पोलीस उपनिरीक्षक इंगोले, पोलीस हवालदार नशीब पठाण, पोलीस शिपाई बाळकृष्ण कांबळे, माणिक चौधरी आणि एकनाथ सावंत यांच्या पथकाने ही कारवाई केली. जिंतूर शहरातील विविध भागांत सुरू असलेल्या अवैध जुगार अड्ड्यांवर पोलिसांनी कठोर कारवाई करावी, अशी मागणी नागरिकांकडून होत आहे. विशेषतः शैक्षणिक संस्थांच्या परिसरात अशा अवैध व्यवसायांना आळा घालण्यासाठी पोलिसांनी नियमित गस्त वाढवून कारवाई करावी, अशी अपेक्षा व्यक्त होत आहे.