शिक्षक प्रवीण सोनवणे यांच्या सेवानिवृत्तीनिमित्त कौटुंबिक सत्कार सोहळा : मान्यवरांच्या उपस्थितीत सोहळा उत्साहात

परभणी,(प्रतिनिधी) : बालविद्या मंदिर हायस्कूलचे शिक्षक व समुपदेशक प्रवीण सोनवणे यांच्या सेवानिवृत्तीनिमित्त शनिवारी (दि.10) येथील अक्षदा मंगल कार्यालयात कौटुंबिक सत्कार सोहळ्याचे आयोजन करण्यात आले. या सोहळ्यात त्यांच्या प्रदीर्घ शैक्षणिक सेवेचा, विद्यार्थ्यांच्या जडणघडणीत दिलेल्या योगदानाचा तसेच प्रेमळ व मनमिळाऊ व्यक्तिमत्त्वाचा गौरव करण्यात आला.
परभणीतील ‘तन-मन-धन’ प्रतिष्ठानचे संस्थापक नंदुसेठ तापडिया यांच्या पुढाकाराने आणि सुभाष बाकळे, डॉ. व्ही. डी. पाटील, सूर्यकांत जेठुरे, संजय देशमुख, अशोक पाटील व संजय ठाकरे यांच्या सहकार्याने या स्नेहपूर्ण सोहळ्याचे आयोजन करण्यात आले होते. या कार्यक्रमाला माजी मंत्री सुरेशराव वरपुडकर, प्रसिद्ध विधिज्ञ अशोक सोनी, अस्थिरोगतज्ज्ञ डॉ. विवेक नावंदर आणि प्राध्यापक नलावडे यांच्यासह विविध क्षेत्रांतील मान्यवर उपस्थित होते. मान्यवरांनी सोनवणे यांच्या शैक्षणिक कारकिर्दीचे कौतुक करताना विद्यार्थ्यांना केवळ पुस्तकी ज्ञान न देता जीवनमूल्यांची शिकवण देण्यात त्यांनी बजावलेल्या महत्त्वपूर्ण भूमिकेचा गौरव केला. या कौटुंबिक स्नेहमेळाव्यास परभणीतील प्रतिष्ठित नागरिक, व्यापारी, डॉक्टर, वकील, शिक्षक तसेच कृषी विद्यापीठातील प्राध्यापक मोठ्या संख्येने उपस्थित होते. विविध क्षेत्रांतील मान्यवरांच्या उपस्थितीमुळे सोहळ्याला स्नेह आणि आपुलकीचे स्वरूप प्राप्त झाले. कार्यक्रमानंतर उपस्थितांसाठी स्नेहभोजनाचे आयोजन करण्यात आले होते.
सेवानिवृत्ती ही नोकरीतील एका पर्वाची समाप्ती असली, तरी आपल्या कार्यातून विद्यार्थ्यांच्या मनात आणि समाजात निर्माण केलेले स्थान कायम राहते, या भावनेतून सोनवणे यांच्या कार्याचा गौरव करण्यात आला. त्यांच्या पुढील आयुष्यासाठी उत्तम आरोग्य, आनंद, समाधान आणि दीर्घायुष्याच्या शुभेच्छा व्यक्त करण्यात आल्या. कर्तृत्ववान व्यक्तींच्या कार्याचा सन्मान करताना माणुसकीची नाती, स्नेह आणि आपुलकी जपण्याचा आदर्श या कौटुंबिक सत्कार सोहळ्याच्या माध्यमातून उपस्थितांसमोर आला.