श्‍वासनलिकेच्या गंभीर आजाराने त्रस्त दोन रुग्णांवर यशस्वी शस्त्रक्रिया : परभणी मेडिकल कॉलेज व आर.पी. हॉस्पिटलमध्ये मोंटगोमेरी टी-ट्यूबद्वारे उपचार; शासकीय आरोग्य योजनेतून दिलासा

परभणी,(प्रतिनिधी) : श्‍वासनलिकेचे अत्यंत तीव्र अरुंदीकरण झाल्याने श्‍वास घेणे आणि बोलणे कठीण झालेल्या दोन रुग्णांवर परभणी मेडिकल कॉलेज व आर.पी. हॉस्पिटल अ‍ॅन्ड रिसर्च इन्स्टिट्यूट येथे मोंटगोमेरी टी-ट्यूबद्वारे श्‍वासनलिका स्टेंटिंगची यशस्वी शस्त्रक्रिया करण्यात आली. या उपचारांमुळे दोन्ही रुग्णांच्या प्रकृतीत लक्षणीय सुधारणा झाली असून, त्यांना पुन्हा दैनंदिन कामकाज आणि रोजगार सुरू करणे शक्य झाले आहे.
परभणी मेडिकल कॉलेजचे संस्थापक अध्यक्ष आमदार डॉ. राहुल पाटील यांच्या मार्गदर्शनाखाली महाविद्यालयाचे अधिष्ठाता डॉ. प्रमोद शिंदे आणि वैद्यकीय अधीक्षक डॉ. अमेर तडवी यांनी शस्त्रक्रिया करणार्‍या डॉक्टरांचे अभिनंदन केले. कान-नाक-घसा तज्ज्ञ डॉ. एम. डी. फैज उर रहमान यांनी ऑपरेशन थिएटरमधील किशोर नवले आणि इतर सहकारी कर्मचार्‍यांच्या मदतीने या दोन्ही गुंतागुंतीच्या शस्त्रक्रिया यशस्वीपणे पार पाडल्या. दोन्ही रुग्ण आर्थिकदृष्ट्या दुर्बल असून, रोजंदारीवर काम करून आपल्या कुटुंबाचा उदरनिर्वाह करत होते. श्‍वासनलिका अत्यंत अरुंद झाल्यामुळे त्यांना श्‍वास घेण्यास आणि बोलण्यास अडचणी येत होत्या. परिणामी, त्यांच्या दैनंदिन जीवनावर तसेच रोजगारावर मोठा परिणाम झाला होता.
शस्त्रक्रिया आणि त्यानंतरच्या उपचारांमुळे दोन्ही रुग्णांच्या प्रकृतीत सुधारणा झाली आहे. आता ते व्यवस्थित बोलू शकत असून, दैनंदिन कामे करण्यासोबतच पुन्हा कामावर जाण्यासही सक्षम झाले आहेत. त्यामुळे त्यांना स्वतःची उपजीविका सुरू ठेवण्यास आणि कुटुंबाला आर्थिक आधार देण्यास मदत झाली आहे. विशेष म्हणजे, या दोन्ही शस्त्रक्रिया शासकीय आरोग्य योजनेअंतर्गत करण्यात आल्या.