बंजारा आरक्षणाच्या मागणीसाठी तरुणाची आत्महत्या : जिंतूर तालुक्यातील केहाळ तांडा येथील घटना

जिंतूर,(प्रतिनिधी) : बंजारा समाजाला अनुसूचित जमातीचे (एसटी) आरक्षण मिळावे, या मागणीसाठी जिंतूर तालुक्यातील केहाळ तांडा येथील विजय प्रल्हाद चव्हाण (वय 36) यांनी मंगळवारी (दि. 13) आत्महत्या केल्याची घटना घडली. या घटनेमुळे परिसरात हळहळ व्यक्त होत आहे.
विजय चव्हाण हे शेती व्यवसाय करीत होते. मुलांच्या शिक्षणाची व भविष्याची जबाबदारी असलेल्या विजय यांना बंजारा समाजाला एसटी आरक्षण मिळाल्यास मुलांना नोकरीच्या संधी उपलब्ध होतील, अशी आशा होती. त्यांची मुलगी पोलीस भरतीसाठी प्रयत्न करीत असल्याने आरक्षणाच्या प्रश्‍नावरून ते मागील काही महिन्यांपासून व्यथित असल्याचे कुटुंबीयांनी सांगितले. मंगळवारी दुपारी शेतात गेल्यानंतर विजय यांनी गळफास घेऊन आत्महत्या केली. घटनेची माहिती मिळताच नातेवाइकांनी घटनास्थळी धाव घेतली आणि त्यांना जिंतूर येथील शासकीय रुग्णालयात नेले. तेथे डॉक्टरांनी तपासून त्यांना मृत घोषित केले. घटनेची माहिती मिळाल्यानंतर सहायक पोलीस निरीक्षक दत्तात्रय गुगाणे यांनी प्राथमिक पंचनामा केला.
चव्हाण यांच्या खिशात चिठ्ठी आढळल्याची माहिती असून, बंजारा समाजाला आरक्षण मिळत नसल्याने आत्महत्या करीत असल्याचा उल्लेख त्यात असल्याचे तक्रारीत नमूद करण्यात आले आहे. या प्रकरणी जिंतूर पोलीस ठाण्यात नोंद करण्यात आली असून, पोलीस निरीक्षक नामदेव रेड्डी यांच्या मार्गदर्शनाखाली सहायक पोलीस निरीक्षक दत्तात्रय गुगाणे पुढील तपास करीत आहेत.
दरम्यान, चव्हाण यांच्या पश्‍चात पत्नी लक्ष्मीबाई, मुलगी प्रभावती (वय 19) आणि दोन मुले असा परिवार आहे.