दुष्काळग्रस्तांच्या मदतीसाठी अ‍ॅड. माधवराव भोसले यांच्याकडून लाख रुपयांची मदत

परभणी ( प्रतिनिधी) दुष्काळाच्या पार्श्वभूमीवर सामाजिक बांधिलकी जपत परभणी येथील सुप्रसिद्ध ज्येष्ठ विधिज्ञ अ‍ॅड. माधवराव एकनाथराव भोसले यांनी दुष्काळग्रस्तांच्या मदतीसाठी मुख्यमंत्री सहाय्यता निधीसाठी एक लाख रुपयांचा धनादेश जिल्हाधिकारी संजयसिंह चव्हाण यांच्याकडे सुपूर्द केला. या उपक्रमातून त्यांनी सामाजिक संवेदनशीलतेचा आणि जनहिताच्या कार्याचा आदर्श समाजासमोर ठेवला आहे.
अ‍ॅड. माधवराव भोसले यांच्या अमृत महोत्सवी वर्षानिमित्त आयोजित कार्यक्रमाच्या पार्श्वभूमीवर हा मदतीचा उपक्रम राबविण्यात आला. दुष्काळामुळे अडचणीत सापडलेल्या नागरिकांना मदतीचा हात मिळावा, या उद्देशाने एक लाख रुपयांचा धनादेश जिल्हाधिकारी संजयसिंह चव्हाण यांच्याकडे सुपूर्द करण्यात आला.
यावेळी अ‍ॅड. माधवराव भोसले, अ‍ॅड. राजेंद्र रसाळ नांदापुरकर, अ‍ॅड. नितीन भोसले, अ‍ॅड. अभिषेक लोखंडे आदी मान्यवर उपस्थित होते. दुष्काळाच्या संकटात गरजू नागरिकांना मदत मिळावी आणि समाजातील विविध घटकांनी सामाजिक उत्तरदायित्वाची जाणीव ठेवून पुढाकार घ्यावा, हा या उपक्रमामागील महत्त्वाचा संदेश आहे. अ‍ॅड. माधवराव भोसले यांच्या या योगदानाचे सर्व स्तरांतून अभिनंदन करण्यात येत आहे.