आयुर्वेद व्यासपीठ परभणीतर्फे आयोजित व्याख्यानात महिलांचे मानसिक आरोग्य व सायबर गुन्ह्यांबाबत तज्ज्ञांचे मार्गदर्शन

परभणी,(प्रतिनिधी) : जागतिक महिला दिनानिमित्त आयुर्वेद व्यासपीठ परभणीच्या वतीने निरामय योग केंद्र, परभणी येथे विशेष व्याख्यानाचे आयोजन करण्यात आले होते.
या कार्यक्रमात संभाजीनगर येथील प्रसिद्ध मानसोपचार तज्ज्ञ डॉ. दिपाली देशमुख यांनी ‘महिलांचे मानसिक आरोग्य’ या विषयावर मार्गदर्शन केले. महिलांनी दैनंदिन जीवनातील ताणतणाव कसा हाताळावा, मानसिक आरोग्य कसे जपावे याबाबत त्यांनी सविस्तर माहिती दिली. यावेळी अ‍ॅड. मंजुषा बागल यांनी ‘सायबर क्राईम’ या विषयावर मार्गदर्शन करत महिलांनी सोशल मीडियाचा वापर करताना घ्यावयाची काळजी, ऑनलाइन फसवणूक टाळण्यासाठी आवश्यक खबरदारी तसेच कायदेशीर उपाययोजना याबाबत माहिती दिली.
या कार्यक्रमाला परभणी शहरातील महिलांचा उत्स्फूर्त प्रतिसाद लाभला. कार्यक्रमाच्या यशस्वी आयोजनासाठी आयुर्वेद व्यासपीठ परभणीचे अध्यक्ष विनोद पत्की, उपाध्यक्ष विद्या भालेराव, सचिव गुरुदत्त चौधरी यांनी पुढाकार घेतला. कार्यक्रमाचे सूत्रसंचालन श्रीमती पारवे यांनी केले. यावेळी कुणाल कौसडीकर, स्वप्नजा कळमकर, सहसचिव पूजा बाहेती, स्मिता कुलकर्णी, मेघना मुंदडा तसेच इतर महिला सदस्यांनी कार्यक्रमाच्या आयोजनासाठी सहकार्य केले.