भाजपाद्वारे दोन लाख सदस्य नोंदणीचा संकल्प

परभणी,(प्रतिनिधी) : सदस्य नोंदणी अभियानातून या जिल्ह्यात नवीन दोन लाख सदस्य नोंदणीचा संकल्प भारतीय जनता पक्षाच्या पुढार्‍यांनी निरीक्षकांसह संघटनमंत्र्यांसमोर सोडला.
सदस्य नोंदणीच्या पार्श्‍वभूमीवर येथील आयएमएच्या सभागृहात शनिवार 28 डिसेंबर रोजी जिल्हास्तरीय कार्यशाळा आयोजित करण्यात आली होती. यावेळी विभागीय संघटन मंत्री संजय कौडगे, तसेच प्रदेश सचिव राहुल लोणीकर, ग्रामीण जिल्हाध्यक्ष संतोष मुरकुटे, महानगर जिल्हाध्यक्ष राजेश देशमुख, प्रदेश प्रवक्ते डॉ. उमेश देशमुख, जिल्हा महामंत्री सुभाष आंबट, डॉ. केदार खटींग, माजी जिल्हाध्यक्ष डॉ. सुभाष कदम, विलास बाबर, शिवाजीराव मव्हाळे, शशिकांत देशपांडे यांच्यासह अन्य पदाधिकारी उपस्थित होते. यावेळी प्रत्येक पदाधिकार्‍याने या जिल्ह्यात सदस्य नोंदणीचे अभियान मोठ्या प्रमाणावर यशस्वी करण्याचा संकल्प सोडला. लोकसभा, विधानसभा निवडणूकीत भाजप व इतर मित्रपक्षांना पूरक असे वातावरण निर्माण झाले आहे. आगामी स्थानिक स्वराज्य संस्थांच्या निवडणूका डोळ्यासमोर ठेवून सदस्य नोंदणीकरीता निश्‍चितच सर्वार्थाने प्रयत्न करावेत, असे आवाहनसुध्दा यावेळी मान्यवरांनी केले.