परभणी,(प्रतिनिधी) : ताडकळस पोलीस ठाण्याच्या हद्दीतील पिंगळी येथे भरदिवसा घरफोडी करून तब्बल 2 लाख 9 हजार रुपये किमतीचे सोन्या-चांदीचे दागिने लंपास करणार्या दोन चोरट्यांना ताडकळस पोलिसांनी अवघ्या सहा तासांत अटक केली. आरोपींकडून चोरीस गेलेला संपूर्ण मुद्देमाल जप्त करण्यात आला असून पोलिसांच्या तत्पर कारवाईचे परिसरात कौतुक होत आहे.
याबाबत करुणा गुलचंद राजभोज (रा. राहुलनगर, परभणी) यांनी ताडकळस पोलीस ठाण्यात फिर्याद दिली होती. पिंगळी येथील त्यांच्या आई-वडिलांच्या घरात 1 ऑगस्ट रोजी सकाळी 10 ते दुपारी 2 वाजण्याच्या दरम्यान अज्ञात चोरट्यांनी घरात प्रवेश करून कपाटातील सोन्या-चांदीचे दागिने चोरून नेले होते. चोरीस गेलेल्या ऐवजामध्ये 1 लाख 20 हजार रुपये किमतीचे सोन्याचे सेवन पीस, 45 हजार रुपये किमतीची सोन्याची बदाम अंगठी तसेच 44 हजार रुपये किमतीचे 20 तोळे वजनाचे चांदीचे हातातील दंडकडे असा एकूण 2 लाख 9 हजार रुपयांचा मुद्देमाल होता.
घटनेची माहिती मिळताच ताडकळस पोलिसांनी तपासाची चक्रे वेगाने फिरवत अवघ्या सहा तासांत आरोपींची ओळख पटवून त्यांना अटक केली. अटक करण्यात आलेल्या आरोपींची नावे राधेश्याम पी. रामगोपाल गुप्ता (वय 22, रा. जैतापूर महुआ, ता. तुलसीपूर, जि. बलरामपूर, उत्तर प्रदेश, सध्या रा. भोसरी, पुणे) आणि रवि गोविंद पाल (वय 20, रा. बरमपुरा, ता. सोहरतगड, जि. सिद्धार्थनगर, उत्तर प्रदेश) अशी आहेत. पोलिसांनी आरोपींकडून चोरीस गेलेले सोन्याचे सेवन पीस, सोन्याची अंगठी तसेच 20 तोळे वजनाचे चांदीचे दंडकडे असा एकूण 2 लाख 9 हजार रुपये किमतीचा संपूर्ण मुद्देमाल हस्तगत केला आहे.
या प्रकरणी ताडकळस पोलीस ठाण्यात गुन्हा क्रमांक 215/2026 नुसार भारतीय न्याय संहितेच्या कलम 331(3) व 305 अन्वये गुन्हा दाखल करण्यात आला असून पोलीस निरीक्षक श्रीधर जगताप यांच्या मार्गदर्शनाखाली पोलीस उपनिरीक्षक अर्जुन रणखांब पुढील तपास करीत आहेत. ही कारवाई पोलीस निरीक्षक श्रीधर जगताप यांच्या मार्गदर्शनाखाली पोलीस उपनिरीक्षक अर्जुन रणखांब, बालाजी रणेर, भगवान चोरघडे आणि राहुल वडमारे यांनी यशस्वीरीत्या पार पाडली.
Sunday, November 22
ताज्या बातम्या:
- खा. रामराव वडकूते यांचे नवी दिल्लीत अल्पशा आजाराने निधन
- दामपुरी येथून ५ लाखांची बोलेरो पिकअप चोरीला; अज्ञात चोरट्याविरुद्ध गुन्हा
- विशेष लोकअदालतीत 32 प्रकरणे निकाली : धनादेश अनादर प्रकरणांतून 28 लाख 96 हजार 806 रुपयांची वसुली; 21 नोव्हेंबर रोजी आयोजन
- कौसडीच्या सचिन अरुण गिरी यांना पीएच.डी. पदवी प्रदान गावाच्या शिरपेचात मानाचा तुरा
- राष्ट्रीय नवजात शिशु सप्ताहानिमित्त उपजिल्हा रुग्णालय गंगाखेड येथे जनजागृतीपर कार्यक्रमाचे आयोजन
- परभणीतील वाहतूक कोंडी, अतिक्रमण आणि खड्ड्यांचा प्रश्न ऐरणीवर; जिल्हाधिकाऱ्यांकडे AIYF चे सविस्तर निवेदन!
- संत तुकाराम महाविद्यालयात उद्या हभप बाळू महाराज गिरगावकर यांचे कीर्तन; स्व. अॅड. शेषरावजी भरोसे (आबा) यांच्या 17 व्या पुण्यस्मरणानिमित्त आयोजन
- छत्रपती शिवाजी महाराज पुतळा परिसरात बसच्या चाकाखाली सापडून एकाचा मृत्यू ; दुसरा जखमी


