धसाडी परिसरात 153 किलो गांजा जप्त : शेतात गांजाची बेकायदेशीर लागवड; एकास पोलिसांनी घेतले ताब्यात

परभणी,(प्रतिनिधी) : शेतात बेकायदेशीररित्या गांजाची लागवड केल्याचे पोलिसांच्या पाहणीत आढळून आल्याने धसाडी परिसरात खळबळ उडाली. दैठणा पोलिसांनी गुरुवारी (दि. 1) सकाळी मिळालेल्या गुप्त माहितीच्या आधारे कारवाई करत तब्बल 153 किलो गांजा जप्त केला असून, याप्रकरणी एका व्यक्तीस ताब्यात घेतले आहे. जप्त करण्यात आलेल्या गांजाची अंदाजे किंमत 76 लाख रुपये असल्याचे पोलिसांनी सांगितले.
दैठणा पोलिसांना धसाडी परिसरात एका शेतात गांजाची बेकायदेशीर लागवड करण्यात आल्याची माहिती मिळाली होती. त्यानुसार पोलिसांनी सकाळी संबंधित ठिकाणी कारवाई केली. पाहणीदरम्यान गांजाची झाडे आढळून आल्यानंतर पोलिसांनी ती ताब्यात घेत वजन केले असता एकूण 153 किलो गांजा असल्याचे निष्पन्न झाले. या कारवाईनंतर संबंधित व्यक्तीस पोलिसांनी ताब्यात घेतले असून, पुढील तपास सुरू आहे.
घटनेची माहिती मिळताच पोलीस उपअधीक्षक एन. एल. रिठे, सहायक पोलीस निरीक्षक जी. जी. सोनेत, पोलीस उपनिरीक्षक निखिल पवार यांच्यासह हवालदार विठ्ठल कुंडगीर, ज्ञानेश्वर चोपडे, विनोद मुळे, अमोल डुबे, संजय सानप, लक्ष्मीकांत कश्यप, अशोक रसाळ तसेच महसूल प्रशासनाचे अधिकारी आणि न्यायवैद्यक पथक घटनास्थळी दाखल झाले. या प्रकरणी दैठणा पोलीस अधिक तपास करीत आहेत.