महिलेच्या पोटातून काढला दहा किलोचा गोळा; आरपी हॉस्पिटलमध्ये यशस्वी शस्त्रक्रिया

परभणी,(प्रतिनिधी) : येथील पाथरी रस्त्यावरील आरपी हॉस्पिटल व रिसर्च इन्स्टिट्यूट वैद्यकीय महाविद्यालयात एका 65 वर्षीय महिलेच्या पोटातून दहा किलोचा गोळा शस्त्रक्रिया करुन काढण्यात आला.
जिल्ह्यातील ग्रामीण भागातील एक 65 वर्षीय महिलेच्या पोटात सतत दुखत असल्याने त्यांनी आर. पी. हॉस्पिटल येथे शैल्यचिकित्सक डॉ. अमीर तडवी, डॉ. भीमराव कनकुटे यांना दाखवले. त्यावेळी त्यांनी केलेल्या सोनोग्राफी तपासणीमध्ये महिलेच्या पोटात दहा किलो वजनाचा गोळा तसेच गर्भपिशवी देखील खराब झाल्याचे आढळून आले, त्यामुळे तातडीने शस्त्रक्रिया करणे गरजेचे असल्याने हॉस्पिटलने तात्काळ महाविद्यालयाचे अधिष्ठाता डॉ. प्रमोद शिंदे यांच्या मार्गदर्शनाखाली शस्त्रक्रियेची परवानगी घेतली. दोन तासापेक्षा अधिक झालेल्या शस्त्रक्रियेनंतर महिलेच्या पोटातून दहा किलोचा गोळा आणि गर्भपिशवी काढण्यात आली. त्यामुळे महिलेची प्राण वाचले.
दरम्यान, या शस्त्रक्रियेसाठी डॉ. अमीर तडवी, डॉ. भीमराव कनकुटे, डॉ. श्रुती शहारे यांच्यासह कर्मचारी संध्या आळणे, किशोर नवले आदींनी परिश्रम घेतले. यावेळी रुग्ण आणि त्यांच्या नातेवाईकांनी आरपी हॉस्पिटलचे आभार व्यक्त केले.