पहलगाम घटनेच्या निषेधार्थ शिवसेनेतर्फे परभणीत जोरदार निदर्शने: जिल्हाधिकार्‍यांना निवेदन सादर 

परभणी,(प्रतिनिधी) : जम्मू काश्मिर येथील पहलगाम या पर्यटनस्थळी हिंदू पर्यटकांवर अतिरेक्यांनी केलेल्या भ्याड हल्ल्याच्या निषेधार्थ येथील शिवसेनेच्या (शिंदे गट) नेतेमंडळींनी बुधवारी (दि.23) परभणीत जोरदार निदर्शने केली.
जिल्हाप्रमुख व्यंकटराव शिंदे, संपर्कप्रमुख माजी खासदार अ‍ॅड. सुरेश जाधव, सहसंपर्क प्रमुख भास्कर लंगोटे पाटील, मागासवर्गीय सेलचे जिल्हा प्रमुख धम्मदीप रोडे, मागासवर्गीय जिल्हा सेलचे माजी जिल्हा प्रमुख माणिकराव कदम, महानगरप्रमुख नितेश देशमुख, तालुका प्रमुख प्रभाकरराव कदम, विधानसभा संघटक अशोकराव पाटील यांच्यासह अन्य नेतेमंडळींनी जिल्हा प्रशासनास एक निवेदन सादर करीत या भ्याड हल्ल्याच्या निषेधार्थ सकल हिंदू समाजातून तीव्र प्रतिक्रिया उमटल्या आहेत, असे नमूद केले. या अतिरेकी कारवायांचा कायमस्वरुपी बंदोबस्त करण्याकरीता सरकारने कठोर पाऊले उचलावीत, अशी अपेक्षाही व्यक्त करण्यात आली.