गोदावरी नदीपात्रात बुडून 12 वर्षीय मुलाचा मृत्यू

परभणी,(प्रतिनिधी) : पालम तालुक्यातील मौजे फळा परिसरातील गोदावरी नदीपात्रात आंघोळीसाठी गेलेल्या 12 वर्षीय मुलाचा पाण्यात बुडून दुर्दैवी मृत्यू झाला. ही घटना गुरुवारी (11 जून) सायंकाळी साडेसहा वाजण्याच्या सुमारास घडली.
साई कैलास पवार (वय 12 वर्षे, रा. रायवाडी, ता. लोहा, जि. नांदेड) हा मुलगा आपल्या कुटुंबासह मौजे फळा येथे देवदर्शनासाठी आला होता. गुरुवारी सायंकाळी साडेसहा वाजण्याच्या सुमारास तो गावातील नदीपात्रात आंघोळ करण्यासाठी उतरला. मात्र त्याला पोहता येत नसल्याने तसेच पाण्याचा खोलीचा अंदाज न आल्याने त्याचा पाण्यात बुडून मृत्यू झाला.
घटनेची माहिती कैलास पवार यांनी पालम पोलिस ठाण्यात दिली. त्यांच्या खबरवरून पालम पोलिस ठाण्यात अकस्मात मृत्यूची नोंद करण्यात आली आहे. पुढील तपास पोलीस निरीक्षक अविनाश गोविंद यांच्या आदेशानुसार पोलीस हवालदार गणेश, पोलीस हवालदार विलास कदम हे करीत आहेत.