सणासुदीच्या गर्दीसाठी दक्षिण मध्य रेल्वेच्या विशेष गाड्या : नांदेड-निजामुद्दीन, जालना-छपरा आणि नांदेड-उधना मार्गावर साप्ताहिक विशेष गाड्यांच्या फेर्‍या

परभणी,(प्रतिनिधी) : सणासुदीच्या काळात प्रवाशांची वाढणारी गर्दी लक्षात घेऊन दक्षिण मध्य रेल्वेतर्फे विविध मार्गांवर साप्ताहिक विशेष गाड्या चालविण्यात येणार आहेत. हजूर साहिब नांदेड-हजरत निजामुद्दीन, जालना-छपरा आणि हजूर साहिब नांदेड-उधना या मार्गांवर ऑक्टोबर व नोव्हेंबर महिन्यात विशेष गाड्यांच्या एकूण 38 फेर्‍या चालविण्यात येणार आहेत.
गाडी क्रमांक 07621 हजूर साहिब नांदेड-हजरत निजामुद्दीन विशेष गाडी शनिवार, 17 ऑक्टोबर ते 28 नोव्हेंबरदरम्यान सात फेर्‍या करेल. परतीची गाडी क्रमांक 07622 हजरत निजामुद्दीन-हजूर साहिब नांदेड रविवार, 18 ऑक्टोबर ते 29 नोव्हेंबरदरम्यान सात फेर्‍या करणार आहे. या दोन्ही गाड्यांना पूर्णा, परभणी, सेलू, परतूर, जालना, छत्रपती संभाजीनगर, मनमाड, जळगाव, भुसावळ, खंडवा, इटारसी, भोपाळ, बिना, झाशी, ग्वाल्हेर, आग्रा कँट आणि मथुरा स्थानकांवर थांबा देण्यात आला आहे. या गाड्यांना 1 एसी, 2 एसी, 3 एसी, शयनयान आणि सामान्य द्वितीय श्रेणीचे डबे असतील.
गाडी क्रमांक 07651 जालना-छपरा विशेष गाडी बुधवार, 7 ते 28 ऑक्टोबरदरम्यान चार फेर्‍या करेल, तर गाडी क्रमांक 07652 छपरा-जालना विशेष गाडी शुक्रवार, 9 ते 30 ऑक्टोबरदरम्यान चार फेर्‍या करणार आहे. या गाड्या छत्रपती संभाजीनगर, नगरसोल, मनमाड, भुसावळ, खंडवा, हरदा, इटारसी, पिपरिया, गाडरवारा, नरसिंहपूर, जबलपूर, कटनी, मैहर, सतना, माणिकपूर, प्रयागराज छिवकी, विंध्याचल, वाराणसी, औंरीहार, गाझीपूर सिटी आणि बलिया स्थानकांवर थांबतील. या गाड्यांमध्ये 2 एसी, 3 एसी, शयनयान आणि सामान्य द्वितीय श्रेणीचे डबे असतील.
गाडी क्रमांक 07605 हजूर साहिब नांदेड-उधना विशेष गाडी सोमवार, 5 ऑक्टोबर ते 23 नोव्हेंबरदरम्यान आठ फेर्‍या करेल. परतीची गाडी क्रमांक 07606 उधना-हजूर साहिब नांदेड मंगळवार, 6 ऑक्टोबर ते 24 नोव्हेंबरदरम्यान आठ फेर्‍या करणार आहे. या गाड्यांना पूर्णा, बसमत, हिंगोली, वाशिम, अकोला, मलकापूर, भुसावळ, जळगाव, धरणगाव, अमळनेर, नंदुरबार आणि व्यारा येथे थांबा असेल. गाडी क्रमांक 07606 ला शेगाव येथेही थांबा देण्यात आला आहे. या गाड्यांमध्ये 1 एसी, 2 एसी, 3 एसी, शयनयान आणि सामान्य द्वितीय श्रेणीचे डबे असतील.
सणासुदीच्या काळात प्रवाशांना अतिरिक्त प्रवासी सुविधा उपलब्ध व्हाव्यात, या उद्देशाने या विशेष गाड्या चालविण्यात येत असल्याची माहिती दक्षिण मध्य रेल्वेच्या नांदेड मंडळाच्या जनसंपर्क विभागाने दिली आहे.