अखिल भारतीय विद्यार्थी परिषदेच्यावतीने राष्ट्रीय विद्यार्थी दिनानिमित्त भव्य मशाल रॅली

परभणी,(प्रतिनिधी) : येथील अखिल भारतीय विद्यार्थी परिषदेच्या वतीने राष्ट्रीय विद्यार्थी दिनानिमित्त बुधवारी (दि.09) सायंकाळी खंडोबा बाजार येथील मराठवाडा हायस्कूलच्या प्रांगणातून छत्रपती शिवाजी महाराज यांच्या पूर्णाकृती पुतळ्यापर्यंत भव्य मशाल रॅली काढण्यात आली.
या मशाल रॅलीत मोठ्या संख्येने विद्यार्थी व विद्यार्थीनी सहभागी झाले होते. अतिशय शिस्तबध्द पध्दतीने निघालेल्या या मशाल यात्रेत कार्यकर्ते पेटती मशाल हातात घेऊन अग्रभागी होते. यावेळी विद्यार्थी परिषद जिंदाबाद, भारत माता की जय, वंदे मातरम्, जय श्री राम वगैरे घोषणांनी प्रमुख चौकांसह रस्ते दणाणून गेले.
छत्रपती शिवाजी महाराज यांच्या पूर्णाकृती पुतळा परिसरात या मशाल यात्रेचा समारोप झाला. यावेळी विद्यार्थी परिषदेचे विभागीय संघटन मंत्री शुभम स्वामी, शहर संघटन मंत्री सुशांत एकुर्गे यांच्यासह अन्य पदाधिकारी मोठ्या संख्येने सहभागी होते.