विधानसभेत तालिका सभापती म्हणून आमदार डॉ.राहुल पाटील यांची नियुक्ती

परभणी (प्रतिनिधी)  महाराष्ट्र राज्याच्या विधानसभेचे सलग तिसºयांदा नेतृत्व करणारे तसेच वरीष्ठ सदस्य, परभणी विधानसभा मतदार संघाचे शिवसेना ठाकरे गटाचे आ. डॉ. राहुल पाटील यांची नागपूर येथील संपूर्ण हिवाळी अधिवेशनासाठी तालीका सभापती म्हणून नियुक्ती झाली आहे.
तालिका सभापतींची नियुक्ती ही विधानसभेचे सभापती करतात.आ.डॉ.राहुल पाटील हे सलग तिसºयांदा परभणी विधानसभा मतदारसंघातून निवडून आले असून सभागृहाचे जेष्ठ सदस्य आहेत.
प्रत्येक अधिवेशनात मतदारसंघासह विविध प्रश्नांवर अभ्यासपूर्ण मांडणी आ. पाटील यांनी केली आहे.
नागपूर हिवाळी अधिवेशनात सभापती राहुल नार्वेकर यांनी तालिका सभापती म्हणून आमदार डॉ. पाटील यांच्या नावाची घोषणा केली. परभणी विधानसभेला आ. डॉ. पाटील यांच्यामुळे प्रथमच हा बहुमान मिळाला आहे. याबद्दल आमदार पाटील यांचे सर्व स्तरातून अभिनंदन होत आहे.
*तालिका सभापतींचे कर्तव्य*
सभागृहाचे कामकाज चालवण्यासाठी मुख्य सभापतींच्या अनुपस्थितीत त्यांची जबाबदारी पार पाडण्यासाठी निवडलेल्या सदस्यांना तालिका अध्यक्ष किंवा तालिका सभापती असे म्हणतात. ही निवड करण्यामागचा उद्देश सभागृहाचे कामकाज कोणत्याही अडथळ्याशिवाय सुरू ठेवणे हा असतो. तालिका सभापती हे सभागृहातील महत्त्वाचे सदस्य असतात, जे मुख्य सभापतींच्या गैरहजेरीत पीठासीन अधिकारी म्हणून काम करतात आणि सभागृहाचे कामकाज सुरळीत चालवतात. तालिका सभापती विधानसभा अध्यक्षांना सभागृह चालवण्यात सहाय्य करतात. याशिवाय कामकाज कोणत्या क्रमाने घ्यायचे याची योजना तयार करण्यात त्यांची महत्वपूर्ण भुमिका असते. तसेच नियम व प्रक्रिया योग्य प्रकारे पाळल्या जात आहेत याची खात्री करण्याची जिम्मेदारी तालिका सभापती यांच्यावर असते.