परभणी,(प्रतिनिधी) : आषाढी एकादशीच्या निमित्ताने बालगोपाळांमध्ये वारकरी परंपरेचे संस्कार रुजविण्यासाठी विश्व हिंदू परिषद, परभणीच्या वतीने गेल्या 48 वर्षांपासून आयोजित करण्यात येणारी भव्य गोपाळ दिंडी यंदाही उत्साहात आयोजित करण्यात आली आहे. शनिवार 25 जुलै रोजी सकाळी 8 वाजता माळी वेस येथील हनुमान मंदिरातून दिंडीला प्रारंभ होणार असून शहरातील सर्व शाळांनी विद्यार्थ्यांसह मोठ्या संख्येने सहभागी व्हावे, असे आवाहन आयोजकांनी केले आहे.
आषाढी एकादशीला लाखो वारकरी पंढरपूरची वारी करतात. त्याच परंपरेचा संस्कार बालकांवर व्हावा, या उद्देशाने परभणीत ‘प्रति पंढरपूर’ उभारण्याचा उपक्रम विश्व हिंदू परिषद गेल्या चार दशकांहून अधिक काळ सातत्याने राबवत आहे. या दिंडीत संत परंपरा, वारकरी संस्कृती, भक्तीभाव आणि सामाजिक एकात्मतेचे दर्शन घडते. यंदाच्या दिंडीत संत मेळा, चलचित्र, पावली वारकरी, टाळ-मृदंग, अभंगगायन तसेच पारंपरिक वेशभूषा अशा विविध उपक्रमांचे आयोजन करण्यात आले आहे. विद्यार्थ्यांनी या उपक्रमांमध्ये उत्स्फूर्त सहभाग नोंदवावा, असे आवाहन करण्यात आले आहे.
दिंडीचा मार्ग माळी वेस येथील हनुमान मंदिर, नारायण चाळ, स्टेशन रोड, गुजरी बाजार, शिवाजी चौक, नाना पेठ, विद्यानगर मार्गे माऊली मंदिर असा राहणार असून तेथे दिंडीचा समारोप होईल. प्रारंभी यजमानांच्या हस्ते पालखी पूजन करण्यात येणार आहे.
यावर्षीच्या दिंडीचे विशेष आकर्षण म्हणून डॉ. संजय टाकळकर यांच्याकडून पंढरपूरच्या धर्तीवर अश्वारोहण आणि रिंगण सोहळ्याचे आयोजन करण्यात आले असून हा सोहळा भाविकांसाठी विशेष आकर्षण ठरणार आहे. दिंडीत सहभागी होणार्या बालगोपाळांसाठी शहरातील प्रतिष्ठित व्यापारी, व्यापारी असोसिएशन, सराफा असोसिएशन, लायन्स क्लब तसेच विविध सामाजिक संस्थांच्या वतीने प्रसाद व फराळाचे वाटप करण्यात येणार आहे.
या उपक्रमासाठी विश्व हिंदू परिषदेचे जिल्हाध्यक्ष सुरेंद्र शहाणे, जिल्हामंत्री राजकुमार भामरे, जिल्हा सहमंत्री मनोज काबरा, शहराध्यक्ष अशोक जैन (राका) तसेच मराठवाडा हायस्कूलचे मुख्याध्यापक व विश्व हिंदू परिषद क्षेत्रमंत्री अनंत पांडे यांचे मार्गदर्शन लाभत आहे. 48 वर्षांची ही वैभवशाली परंपरा अधिक समृद्ध करण्यासाठी शहरातील सर्व शाळांनी विद्यार्थ्यांसह मोठ्या संख्येने सहभागी व्हावे, असे आवाहन सुनील रामपूरकर, शिवप्रसाद कोरे, गोपाळ रोडे, अभिजित कुलकर्णी आणि विनोद लोलगे यांनी केले आहे.
Sunday, November 22
ताज्या बातम्या:
- खा. रामराव वडकूते यांचे नवी दिल्लीत अल्पशा आजाराने निधन
- दामपुरी येथून ५ लाखांची बोलेरो पिकअप चोरीला; अज्ञात चोरट्याविरुद्ध गुन्हा
- विशेष लोकअदालतीत 32 प्रकरणे निकाली : धनादेश अनादर प्रकरणांतून 28 लाख 96 हजार 806 रुपयांची वसुली; 21 नोव्हेंबर रोजी आयोजन
- कौसडीच्या सचिन अरुण गिरी यांना पीएच.डी. पदवी प्रदान गावाच्या शिरपेचात मानाचा तुरा
- राष्ट्रीय नवजात शिशु सप्ताहानिमित्त उपजिल्हा रुग्णालय गंगाखेड येथे जनजागृतीपर कार्यक्रमाचे आयोजन
- परभणीतील वाहतूक कोंडी, अतिक्रमण आणि खड्ड्यांचा प्रश्न ऐरणीवर; जिल्हाधिकाऱ्यांकडे AIYF चे सविस्तर निवेदन!
- संत तुकाराम महाविद्यालयात उद्या हभप बाळू महाराज गिरगावकर यांचे कीर्तन; स्व. अॅड. शेषरावजी भरोसे (आबा) यांच्या 17 व्या पुण्यस्मरणानिमित्त आयोजन
- छत्रपती शिवाजी महाराज पुतळा परिसरात बसच्या चाकाखाली सापडून एकाचा मृत्यू ; दुसरा जखमी


